Статьи по темѣ:

  • [Вернуться]
  • Как учить мужу свою жену (совруяз)
  • Бесѣда отца съ сыномъ о женской злобѣ
  • Как врачеваться христианам от болезни и всякой скорби
    О неправедной жизни
    24. О неправедномъ житіи
    Менделеев

    Послѣднія добавленія

    [26.10.2018 Кружки и секции для детей и пенсионеров]    [16.07.2018 Отец в семье]    [26.12.2017 Россияне не экономят на новогодних ёлках]    [15.11.2017 В школах России всё больше молодых педагогов]    [01.11.2017 Вместо учебников – интерактивный пол и стол с сенсорным управлением]    [06.10.2017 Почему важно высыпаться? ]    [19.09.2017 Ландшафтный парк «Зарядье»]    [15.08.2017 Как научиться предсказывать ураганы? ]    [19.07.2017 В России лечат патологии костной ткани]    [13.07.2017  Российские ученые изобрели электронный глаз]   
     О реальной красоте журналы не пишут

    Выборъ читателей:

    Павелъ Третьяковъ ...Оценка: Великолепно!
    Символы невѣсты въ русскомъ свадебномъ ритуалѣ ...Оценка: Великолепно!
    Василій Суриковъ ...Оценка: Великолепно!
    Плотники ...Оценка: Прекрасно
    Любящій мужъ. Какой онъ? ...Оценка: Прекрасно
    27/05/2009

    Предисловіе ко 2-му

    Въ настоящемъ 2-мъ изданіи, содержаніе выпуска вновь тщательно просмотрѣно, ... Далее

    Бесѣда отца съ сыномъ о женской злобѣ


    23/02/2010 Просмотров: 2567

    Бесѣда отца съ сыномъ о женской злобѣ «Послушай, сыне мой, приклони уши свои, внуши словеса устъ моихъ, да скажу ти: исперва сотвори Богъ человека единаго от всѣх стихий и нарече имя ему Адам, и потом успе Адам, и взят Богъ ребро его и сотвори ему жену. И Адам не прелстися, но жена его прелстися советом змииным, и тоя ради вины все отъято самовластие у жены. И рече Богъ ко Евѣ: «Отныне буди ты покорена мужу своему во всем и повинуйся ему и не буди тебѣ ни единыя въласти над нимъ, той глава тебѣ и господинъ, да владѣет тобою во всем, преступила бо еси повелѣние мое и не восхотѣла еси свободна быти».
    Зри же, сыне мой, яко отъя Богъ у жены самовластие, да не вопреки глаголют мужу своему. Единою бо поучи Евва Адама и всему миру клятву наведе, и запрещение прият прабаба наша в печалех родити чада.
    Рече сынъ ко отцу своему: «Отче, обоим сим вещем писание свидѣтелствует быти истинънѣ. Благовествуя бо Богъ ко своему созданию, посла архангела своего Гаврила к деве Марии, вместо древние печали Еввѣ — радость богородице принесе, рече: «Радуйся, благодатная, господь с тобою и благословенна ты в женах!» Сия радость сопротивна печали и благословение сопротивно клятвы, и вмѣсто Адама — новый Адам — Христос, и вмѣсто Еввы благословенная богородица Мария. И без болезни Адама породи, той же чистотѣ девичести лицы ревнующе и жены по Христе мучившеся, на уди разсѣкаеми, и ко Христу приведошася, того ради вся нова бысть, и женское племя благословися, и яко жена добра мужа своего и по смерти спасет, и дому строителница бывает, и венец похвалы на главу мужу своему сплетши полагает, и яко слаткия воды от устъ ея истекают, и горесть сердечную мужу своему услаждает, милосерда, чадолюбива детем своим бывает, и дом свой въсякими добродѣтелми наполняет; бескровных покрывает, беспомошным помогает, бѣдных призирает, нагих одевает, алчных и жадных накормляет, болных и в темницах посѣщает. И по писанному, всего силнеѣ жена бывает: жена и царей породи и одеяние имъ сотвори, ибо всяк человек от жены рождается и сосцами еѣ питается. И прирече: «Не суть зло естество женское».
    Рече отецъ сыну своему: «Сыне, аще бы не благоволил Богъ от жены родитися и водою креститися и на кресте распятися, то уже приближися весь род ко вратом адовым. О сем, сыне, известно буди тебѣ: в нынешних лътех едина жена от тысящи такова, яко же ты глаголеши, обрящется. А сия в Бытии глаголется: «Позна Адам жену свою и роди от нея сына». Не Евва роди, но Адам роди. И во Евангелии глаголет: «Авраам роди Исаака». Слыши, сыне, не Сарра роди, но Авраам. Но аще и сосцами питаемся, но множицею от них кровию венчаемся; от жен бо многи крови пролияшася, и царства разоришася, и царие от живота гонзнули, села и домы раскопаша.
    Горе граду тому, в нем же властелинствует жена! Горе, горе дому тому, им же владѣет жена! Зло и мужу тому, иже слушает жены! В нынѣшних вецех мнози человецы грады многими владѣют, а женам своим работают. Извыкли бо жены ихъ в зерцало призирати и вапами лица помазовати, и вѣжда свои возвышати, и черновидно лица воображати, и многимъ себѣ уряжением украшати; и многих очеса на видѣние красоты своея превращати: украшают бо телеса своя, а не душу. Уды своя связали шелком, лбы своя подтягнули жемчюгом, ушеса своя позавѣсили драгими серезами, да не слышат гласа божия, ни святых книгъ писания, ни отецъ своих духовных учения. Жены бо познали путь заблуждения, мужие же возлюбили на женах своих многая украшения, а сами восприяли убогое одѣяние на себѣ носити, все для жен своих украшения. О мужие! От кого есть прияли сия обычаи, иже многая полагают на женах своих украшения? От сего вам нѣсть ползы, толко лише вам злое погубление, ибо женское украшение — всегдашняя мужу сухота и приводит его до остраго меча. Много бо сего бываетъ, еже в великия долги себѣ влагают и от того вѣчно погибаютъ, понеже своего не имут, а жен украшают.
    Аще же кто хотѣния ея не исполнит, тогда она зелне воздыхает, слезит и шепчет, ни худа, ни добра не глаголет, очи свои изменяет, нос потупит и зубы своими скрегчет, и что речет муж ея, и она, что меденица пыхнет и пред ним плачет день и нощь и мужу своему покоя не даетъ, гнѣв имѣет, и муж ея от нея покоя не имат. И она глаголет: «Оных мужей жены ходят красно, и вси их чтут, аз же бѣдная, в женах возненавиденая, и всѣми незнаема и от всех укоряема. Почто ты мнѣ нынѣ муж? Дабы аз тебѣ не знала! Аз была дочь богатого отца и матери добрыя и племяни славного и таковых бы родителей дщерь, а толко б аз была девицею, был бы мнѣ муж отца богатого и была бы есмь госпожа добру многу, и вездѣ бы чесна, и хвал-на, и почитаема от всѣх людей!»
    Хочет убо жена, дабы ея вси хвалили и любили и почитали, аще ли иную похвалят, то она возненавидит и вмѣняет не в дружбу, и чужую похвалу в студ влагает. Аще ли муж ея угодити восхощет, то всех ему любити, их же она любит, тако и всѣх сих в ненависти имѣти, их же она возненавидит. И всегда хощет болшину имѣти и никому не хощет покоритися, ни послушати. Всегда хощет повелевати и всего хощет вѣдати, и поучати, и умѣти, аще и не умѣет и не знает, а глаголет: «Умею и знаю». Аще будет прекрасна и лѣпа, многи очи имут на ню зрѣти. Яко же бо в луже вода сѣмо и овамо преходя погибает, тако же и женский разум, яко храмина непокровенна и яко вѣтрило на верхъ горъ скорообразно вертящеся. К таковым женам мнози человецы прелщаются: ов добролѣпием жен, ов разумом, а ин смехотворными утѣхами, инъ краснословием и дарованием и протчими лѣстьми прелщаются. Яко речено есть: «Лутчи купити коня или вола, или ризу, нежели злу жену поняти, понеже не мощно познати, какова обычаем: аще и недобролѣпна или буя, или болна, или блядлива, или горда, или гнѣвлива или иным пороком повреждена и к тому невозможно иныя за себя поняти, доколе она жива. Аще хощеши, сыне мой, без печали жити, то путче не женитися и опосле не тужити».
    Рече сынъ ко отцу своему: «Отче, во Евангелии речено: «Сего ради оставит человек отца своего и матерь и прилѣпится женѣ своей и будета оба в плоть едину». Богъ же ми дастъ жену добронравну, всякими добродетелми украшенну: смирѣнием, молчанием, послушанием, доброумием, пощением и нищелюбием, рукодѣлием, несквѣрноложием. Таковыя жены у бога милости просят о мужех своих, и когда в дому будут и доброй женѣ возрадуются и о дѣлех еѣ, чюжей же радости не зазрю, но всегда радость в дому моем будет».

    Рече отецъ к сыну своему: «Сыне, аще будет тебѣ тако, яко же реклъ еси, блажен еси и добро тебѣ будет, жена твоя, яко лоза плодовита, аще же грѣх ради житие злѣ проводиши и такову жену не обрящеши, яко же хощеши, всегда о ней сердцем скорбиши и в горести сердца речешь: «Блажен той, иже дѣвством живет, да сицевыя жены не обрящет». И ты, сыне, последи злонравную жену не возлюбишь, и в раскаяние придешь, и ничто тебѣ успѣет. Аще ли сицевую обрящеши: пронырливу, лстиву, лукаву, крадливу, блядливу, злоязычну, обавницу, еретицу, медведицу, лвицу, змию, скорпию, василиску, аспидну».

    Рече сынъ ко отцу своему: «Отче, не могу разумѣти словес твоих, скажи ми извѣстно».

    Рече отецъ к сыну своему: «Слыши, сыне мой, про лстивую и пронырливую. Сия рукоделия дѣлати не хощет, а как муж ея придет и она лежит — шипит, стонет, востает — охает, и муж ея сия речет: «Жено, что и о чем скорбиши и ни о чем нерадиши?» И она хотя и здрава, а речет: «Не могу». Сия не строителница дому своему и мужу своему не помощница, и нужного одѣяния не сотворит. Аще что муж ея припасет, и она пронырством все изнурить.

    Слыши, сыне мой, про сварливую и злоязычную: имѣет язык, яко бритву изощренну, на всякого человека наскачет, аки лев, всѣх злословит и укоряет, и осуждает, и на всѣх яд своего языка испущаетъ.

    Слыши, сыне мой, про лукавую и крадливую. Лукавство женское сице: имѣет умъ остр, пред мужем своим показует, и никако же муж ея не может лукавства женского разумѣти, ибо с мужем живет аки бы единодушно, а в сердцы своем мыслит: «Аще муж мой умрет, а живота своего мнѣ не прикажет, и мнѣ за иного мужа пойти не с чем и никто меня убогую за себя не возмет». И се глаголя, мыслит: «Ныне есми всему добру госпожа, учиню себѣ сокровище тайное». И начнет у мужа своего красти, а он того не вѣдает и сице к ней речет: «Жено, что обнищахом и в велицей скудости дом нашъ сотворися?» Она речет: «А то, господине, грѣх ради наших». Сия ли некрадливая, иже все имѣние мужа своего погубит и оба обнищают?

    Слыши, сыне мой, про лстивую и блядливую. Таковая жена мужу своему во стретение изыдет, ланитами склабящися и нравом уничижающися, и за руце мужа принимающе, и одѣяние совлачающе; словесы лстящи, усты лобызающи, сице глаголющи:

    «Пойди, государю мой, свѣт очей моих, сладость гортани моему, зрѣти я без тебя, свѣта моего, не могу, и ни единого слова проглаголати. Лице мое потекло, и сердце мое окаменнело, и егда возрю на тя, свѣта моего, тогда зѣло возрадуюся: составы мои разступаются и вси уди тѣла моего трепещутся и руце мои ослабѣвают. Брак ты мой любезный, всегда пред очима моима есть, егда услышу слаткая твоя словеса, тогда не смѣю что отвѣщати: не отвѣрзутся ми уста, огнь в сердцы моем горит и лице мое палитъ и все составы мои грѣются». И аще будет юн мужъ, и она его вскоре оболстит; и аще в дому его не прилучится, и она близ оконца присѣдит, сѣмо и овамо колеблющися, а со смирением не сидит: скачет, пляшет и всѣм телом движется, сандалиями стучит, руками плещет и пляшет, яко прелстившаяся блудница Иродиада бедрами трясет, хрептом вихляет и главою кивает, голосом поет, языком глаголет бесовская, ризы многи пременяет и в оконцо часто призирает, подобно Иродиаде чинится и многим юнным угодит, и всякого к себе лстит.

    Слыши, сыне мой, про обавницу и еретицу. Из детска начнет у проклятых баб обавничества навыкать и еретичества искать и вопрошати будет многих, какъ бы ей замуж вытти и как бы ей мужа сбавить на первом ложе и в первой бане. И взыщет обавников и обавницъ и волшебств сатанинских, и над ествою будет шепты ухищряти, и под нозе подсыпати, и возглавие и в постелю вшивати, и в порты рѣзаючи, и над челом втыкаючи, и вся-кия прилутшихся к тому промышляти: и корѣнием, и травами примѣщати, и все над мужемъ чарует. Сердце его высосет, тѣло его изсушит, красоты в лице не оставит, и во очесех свѣтлость погубит, и разум отымет, и всякому в поношение вложит его. Сицева сотворит мужа своего и тако его возненавидит, юнных же возлюбит и умерщвляющее зелие сыщет, и подобно время обрящет, и смертным вкусом мужа своего покусит, яко же клас прежде времяни исторгнет.

    Слыши, сыне мой, про медведицу и лвицу. Яко же от таковых зверей едина, егда узрит человека, тогда главу свою похилит и очи свои посупит в землю и злобою пыхнет, на человека нападет и задушит его вскоре, тако и злая жена: главу свою наклонит, и очи посупит, и уста стиснет, даже злобою на мужа своего дыхнет, и на шию его сило наложит, и гортанное дыхание займет, и злѣ кончает.

    А лвица в пустыни на всякого человека и звѣря наскачет и затерзает, тако и злая жена, яко лвица: и домочадец возненавидит, и ризы растерзает, и тѣло кровию обогряет, и власы искореняет, и на мужа рыкает, и злобою восхищает, не лвовы убо зубы ухапает, ни мечем, ниже копием мужа своего закопает, но нравом злѣе лвицы бывает.

    Слыши, сыне мой, про змию и скорпию, ибо змиин род велми в ползающих злобою злѣйши иных гадов: изначала бо велика зла сотвори человеку и проклята от господа змия, того ради пресмыкаяся по земли чревом своим ходит, того же роду и скорпия, и жаба, и черепаха, аще бьешь, или колешь, или стреляешь — ничто ея не возмет, тощию разжещи клещи и имати ю и в огни сожещи, а секнутие ея таково зло, скоростию и до смерти приводит, тако и злая жена в человецѣх инех злѣйши суть.

    Сълыши, сыне мой, ис куста исходит змия и узрит человека и от него бѣжит, а злая жена подле человека лежит, а змииным ядом дышет — сей истинная запазушная змия: донележе муж ея по ней ходит и вопреки ничего не глаголет, и она ему терпит, а егда муж чем погрозит или досадит, и она на него, что змия, шипит, и аще ю бьет жезлием или пинанием, или за власы рванием, то злую жену ничто неймет, но точию разжизает, и она злобою своею, что змию, шипит, в сердце его злохитръством секнет, по времени же и сама умрет, аще не покается — во огнь ввергнется да тамо окаянная накажется.

    Слыши, сыне мой, про ехидну. Такова суть, ибо своих чад ненавидит, аще хощет родити, подшися их съести. Они же прогрызают у неѣ утробу и на древо от нея отходят, и она от того умирает. Сей же уподобишася ехиднѣ нынешние девицы многие: не бывают мужем жены, а во утробѣ имъют, а родить же не хощет и помышляет: «Егда отроча от чрева моего изыдет, и аз его своими руками удавлю». Ибо аще девическую печать и разорит, а девицею именуется, образ бо, яко девица, а нравом, яко окаянная блудница. Ибо кому прилучится таковою женитися, виждь и разумѣи, та бо ходит быстро и очима обзорлива, и нравом буя, и всѣм несчаслива.

    Слыши, сыне мой, про змию василиску. Такова суть, ибо зрѣнием убивает человека, гдѣ завидит — тамо и побивает. Такова бо есмь змия василиска, стрелами своими смертными люта велми человека умерщвляет. Тако же и прокудливая жена нравом злѣе змия василиска, ибо прехитро себѣ украшает и опрятни сандалия обувает, и вѣжда свои ощиплет, и духами учинит, и лице, и шыю вапами повапит и румяностию, и черностию во очѣсех себе украсит, и в одѣяние червленое себѣ облачает, и персни на руце возлагает и вѣрх главы своея златом и камением драгимъ украшает и на лукавыя дѣла тщится. Егда же и грядет, ступает тихо и выю кротце обращает, и очима невскоре смотряет, и зрѣнием умилно взирает, и устне гладце отвѣрзает и вся составы свои на прелести ухищряет, и многия души огнепалными стрелами ухищряет, яко ядом змииным, видѣнием своим юнных убивает, яко разслаблении удове ихъ бываютъ.

    Сыне мой, глаголах ти про аспида, иже зело золъ велми в роду змиевом в семидясяти родехъ, а сей аспид первый от них злобою, и в которую сторону вселится и сотворит ю пусту, а нравом таков есть, еже не может слышати гласа трубного, но разбивает себѣ о камень и скончавается. Тако и злонравная жена не может слышати доброго ей поучения: и уши свои затыкает непослушания камением и непокорѣния жемчюгом драгим, яко аспид хоботом, в которой дом такая жена вселится и сотворит его пуста. Ибо всяка печаль, зло бывает, а корень всему женская злоба».

    Рече сын ко отцу своему: «Отче, апостол рече: «Лутче женитися, нежели разжизатися». Яко же палима пещь огнем, тако же и юношская плоть к вожделению женскому разжизается, ибо огнь естественный не ветром разгнѣщается, но видѣнием красных лиц прелщаются: и время и мѣсто согрешению враг полагает. Женская красота мя прелщает, на ню же взирая — веселъ бываю».

    Рече отец к сыну своему: «Сыне, аще ли не разумѣеши словес моихъ, яко же рекох тебѣ, слыши, да скажу ти извѣстно подробну.

    Сотвори Богъ человека единого и помысли, яко недобро единому быти ему, и успи его в породе райстей, и взят ребро его, и сотвори ему помощницу, рекше жену. Егда же прабаба наша Евва прелстися советом змииным, тако же и мужа своего прелсти, и посети Богъ Адама в раи и рече ему: «Адамъ?» Он же рече: «Се аз, господи». Господь же к нему рече: «Почто заповѣдь мою преобидел еси?» Адам же ко господу рече: «Господи мой, боже, жена мя прелсти, ю же ми дал». И рече ему Богъ: «Почто послушал еси совѣта жены своея? Аз бо дал тебѣ не совѣтницу, ни владѣтелницу над тобою, но поручницу и помочницу тебѣ». И того ради изгна Богъ Адама и жену ево от райския пищи. И по изгнании нача Адам плакатися, сидя и сѣтуя, с плачем взываше: «Увы мнѣ, раю мой прекрасный, яко мене ради сотворен еси, а Еввы ради заключен еси. Увы мнѣ, яко погубих божие человеколюбие и духа святаго благодати удалихся, и коим плачем восплачюся, или которым рыданием возрыдаю, или коим сѣтованием возсѣтую! От рая мое изгнание, и в потѣ и в трудѣх терновное прозябение, и в преисподнех адских мѣстѣх воздыхание помяну». И сице рече: «Увы мнѣ, вся злая сия содѣлавшая и внезапу постигоша, тебѣ ради, жено прелесная. Ты мнѣ незрелое безсмертие пожала еси серпом лукавства змиина, ты бо мою власть на рабство преложила и во очесех свѣтлость помрачила, и нуждею реки слез изливаю. Увы мнѣ, о жено безумная! Почто отлучи мя ангелского мирования и студным дѣлом принуди мя? Ты, прелстившая мя, отиде от мене, уже бо не требую к тому совету твоего пагубного и лукавого, ниже будет о тебѣ промышление мое от сего времяни». И по Адаме правнуцы его многими напастьми и бѣдами пострадали от жен.

    Слыши, сыне мой, како святыи пострадали от жен.

    Ной праведный от жены напоен бысть квасом, смѣшеным с травою и увѣщаем от нея о тайне, иже заповѣда ему ангелъ господенъ з запрещением николи же повѣдати, но ум его не возможе терпѣти от воняния травного и отбеже от главы его, и в забытие прииде память его о запрещении, и сказа тайну женѣ своей и яко отщетився и прииде на мѣсто, идѣ же ковчег дѣлая, и виде, яко разсыпася дѣло его и всѣх живущих на земли, и плакася на мѣсте том 40 дней.

    Тако же Лот праведный в Содомѣ живяше з беззаконными людми и не прикоснуся, и не восколебася имъ, и никогождо осуждая, и того ради Содомского запаления убѣжа, но от лукавства дщерей своих не может убѣжати, но напоен бысть виноградным вином и падеся со дщерми своими и зачат во чревех. Последи же уведѣт грѣх свой, начат сомнѣватися и душею ужасатися, и плакася на горах горко, и бысть Лот дщерем своим посягатель, отец и муж.

    Слышы, сыне мой, про Иосифа праведного, яже рече Писание, в раб продан бысть Иосиф и живяше чистотою душевною и красотою телесною, и лице его, яко солнце, сияя. Зряще же на него господина его жена и желаше насытитися красоты его и тщашеся ласканием запяти Иосифа. И без мужа своего призва его в ложницу свою и нача его увѣщевати, лстящи его и напрасно его охапи руками своими к падению ce6ѣ. Той же отторгнуся от нея, она же ят за ризу его, он же оставив ризу свою в руце ея и отбѣже от нея внѣ двора.

    Прииде же муж ея от полаты царевы, она же взем ризу Иосифову и показа мужу своему и с великою злобою поношаше на Иосифа: «Сей раб твой восхотѣ мнѣ ругатися, жени твоей, аз же не восхотѣ осквернити ложа твоего и возва, иже в дому нашем, он же, оставль ризу, беже от мене».

    Петерфирий же ят вѣру словесем ея и повѣле Иосифа затворити в темнице и смириша во оковах нозе его, лукавыя ради жены. И избави его Богъ и сотвори царя Египту.

    Слыши, сыне мой, про царя Давида, како блуда ради хотя смерть прияти. Богоотецъ великий во пророцех царь Давидъ, когда виде Вирсавию, жену Урину, красну лицем и величеством, и повелѣ привести во свою полату и падеся с нею, и по сотворении блуда озрѣвся вспять и виде ангела стояща и держаща наг мечь над главою его. И паде ниц на землю, молящеся и плачеся горко, глаголюще: «Безвѣстная и тайная премудрости твоея явил ми еси» — и паче рехъ: «Возсмердиша и согниша раны моя, от лица безумия моего пострадах, яко беззаконие мое аз знаю и грѣх мой предо мною есть всегда, тебѣ единому согрѣших и лукавое пред тобою сотворих, отврати лице твое от грѣхъ моих и вся беззаконие мое очисти».

    И услыша господь молѣние его, и возвратися от него ангелъ господень бес крови его, и прия Давидъ духа святаго благодать, и глаголаше: «Аз рѣх, во обилии моем не подвижуся во вѣки».

    Рече сынъ ко отцу своему: «Отче, прияхъ поучение твое и во уверѣние ми бысть. Приточникъ рече: «Не пощади жезла твоего и учи сына своего, его же любиши». Уже аз слышах от тебѣ все по ряду и от словес твоих уразумѣх, и смыслъ свой укрепих, и разума наполнихся, наказанию твоему и опасному житию научихся, и укрепихся, и искусен быхъ».

    Рече отецъ к сыну своему: «Сыне мой, несть тако, яко же реклъ еси, ибо дивна сия вѣщь — жена злая: кротима высится, а биема бѣсится и сворится, а подобна болѣзни никакой. Не превозносися, сыне мой, и не рцы во умѣ твоем и не уповай на премудрость твою и на мужество свое и на храбрость, еже жити со звѣрем сим, что укротити его свирѣпие, и безстуднее сущи полских зверей, и невозможно сущи убѣжати ею. Обрѣли бо есми в Писаниих: «Кто Соломона премудрее или кто Самсона силнее и Александра храбреѣ?» И ти от жен пострадали и скончалися. Соломон в юности своей наполнися разума, яко река многотекущая исполнися притчами и гадании; яко звѣзда утренняя, яко облак и яко луна полна, и во дни сияя, яко солнце и яко маслина славы от нея же сладкий плод приходит; имя его и мудрость во вся страны прослышася, жены же лукавые умъ его помрачиша и, яко рѣку многотекущую, пресушаша, и доброту его погубиша, обратиша на пагубу, и блудом растлиша его, и прелстиша его во идолобѣсие, и сотвориша его поклонятися твари. И тоя ради прелести пророческого дара лишен бысть.

    Слыши, сыне, про Самсона силнаго, иже по благовѣстию родися, да будет силен, и глаголаше: «Аще бы бог укрепилъ колце, то бы моглъ всею вселенною поворотить». И челюстию скотиею по 1 000 на день иноплеменных побивалъ, а жена любодѣица не убояся силы его и напоив, на колѣнех своих успи его и власы, ими же силен бысть, остриже и очи ему ископа и на поругание иноплеменным его предаде.

    Слыши, сыне мой, про царя Александра, яко храбръ бѣ и полестинския страны от востока солнечного вся царствия мира сего своею храбростию к себѣ приклони, а от жены отравлен бысть зелием травным и скончася.

    Илия пророк, славный во пророцех, иже молитвою своею на три лѣта и на шесть месяцъ небо заключи и не одожди земли толико время, и огнь с небесе сведѣ и пятдесятников пожже, а женолюбодѣица лютостию на него дыхну и смертию ему погрози. Пророк же божий убояся злобы и, шед, скрыся в пустыни Хоривстей.

    Иоаннъ великий во пророцех Предтеча, глас слова, светилник света, дѣнница солнца, и воинъ царев, иже достоинством своим велику славу имѣя в зачатии и рожествѣ и житии своем, велику честь имѣя в проповѣдании покаяния, велик проповѣдникъ пред богомь и человеки, достоинством славы своея положи руку свою на пречестнѣю вѣрсе великого бога и первие видѣв славу триипостасного божества и свидетель истинненъ, и житие его, яко солнце, сияя, яко же и нѣкое зерцало пред очима нашима, ибо елико имуть святии жития и сия вся имѣя святый Иоаннъ. И прия от бога имя — ангелом наречен бысть, и в рожденных женами болии не бысть.

    Терпѣния же и проповѣдания ужасеся диавол и нача трепещущи глаголати: «Горе мнѣ, что сей муж творит, и кто ми возвестит будущаго гнѣва бежати? Горе мнѣ, яко будущая возвещает, един стоит пришедший у народа и всѣх учит, укоряет и обличает Ирода и совратницу мою Иродиаду! Горѣ мнѣ, ничто же могу сотворити ему, но вниду во угодницу мою Иродиаду и наполню ея гнѣва».

    И сквѣрная любодѣица испусти гнѣв свой на праведного, не убояся великого во пророцех: скакавши и плясавши Иродовии, и полюбися плясание Ироду, и клятся Ирод дати и до полцарствия своего. Она же, научена матерью своею, испроси главу Иоанна Предтечи. Ирод же повѣле Иоанну главу отсѣщи, и усеченною главою Предтечевою, яко яблоком поиграв на блюде. Его же в пустыни дивии зверие убояшася, змии и аспиды честно нозе его лижуще, а жена зла такова светильника не убояся.

    А великого во апостолѣх евангелиста Иоанна Богослова, наперстника и возлюбленника и друга господня, со учеником его Прохором злая жена по ланитама бияху.

    А великого во святителех покаянию проповѣдника, вселенней учителя и светилника Иоанна Златоустого, учение же его во всю вселенную пройде, яко река многотекущая, царица властолюбица не терпя обличения его с престола его изгна и в далныя страны в заточение засла его.

    Слыши, сыне мой, уразумѣх ли еси словеса моя, яко тебѣ про праотец и про патриархъ, и про пророк, и святых апостол, и святых отецъ рекох, елико они пострадали от неистовства женского, толикою разумных пострадали от них, ибо диавол не может самъ сотворити таковыя пагубы святым, яко же наводит злыми женами, то бо есть оружие дияволе, и мечь сатанин и оболгателница святым. И обретохом азъ написано в «Старчествѣ»: «Нѣкто человекъ добронравен живяше со злою женою и имѣя семь сынов, а всѣ в совершенном возрастѣ, и многаго ради злонравия ея наказуя муж жезлом, она же окаянная убеже в нѣкую пустыню к нѣкоему затворнику старцу толкися глаголаше: «Сего ради пришла к твоей святыни, да избуду напрасные смерти». Он же прият ю в пещеру свою. И помале прелсти его окаянная, и падеся с нею, яко со своею женою, и елико муж ея бияше, она же к затворнику убѣгаше в пустыню и глаголаше: «Уморю мужа своего». Потом же муж ея бияше про злонравие ея, она же умори мужа своего и шести сынов умори по единому, а седмый сынъ, шед во град, сказа народу, и изыдоша людие в пещеру, яша старца и жену ту и, испытавше ихъ огнемъ, сожгоша».

    О сей повести не могу глаголати без слез многих и горкого воздыхания, понеже очи мои зѣлне плачют и душа моя люте трепещет.

    Слыши, сыне мой, кто не прослезится о сем великом старцѣ? Здѣ огнем скончася, а в будущем вѣце злѣ лютей адской муце предастся! О люте! Очи мои слезы многия испустиша, а душа моя зжалѣся и сердце мое восколебася! Колико сей старей подвизався в пустыни, со многочисленными бѣсы боряся, а женою злоокаянною вмале прелстися и погибе, о сем всяк да восплачет умилными слезами и горким воздыханием, сердечным возрыданием!

    Слышах, сыне мой, про нѣкоего мужа, пришедша в дом к женѣ вдовице, и хваляху людие ему да ся оженит ею, понеже юнъ бяше. Она же, окаянная, злонравно с ним живяше нѣколико лет, по времени же умре жена та, онъ же нача продавати дѣти своя и ея. Людие же кленяху его, что тако творит. Он же рече «Егда возрастут и будут обычаем в матерь свою, тогда и мене продадут». И плакася по женѣ своей, людие же глаголаху «Почто плачешися, понеже зла была?» Он же рече: «Плачюся, дабы другая такова не была».

    Нѣкий человекъ рече: «Аз есмь бых в трех нуждах: в темъницы, у вѣсилицы, и двух нужд убежах, а от третие нужды — от злыя жены — не могъ убѣжати».

    Рече сынъ ко отцу своему: «Отче, отяготѣх тягостию, рцы ми слово вкратце: что лихая жена и что злоба еѣ, скажи ми и напиши на сердцы моемъ».

    Рече отецъ к сыну своему: «Слыши, сыне мой, жена злая — домовная буря, многим потоп, неудѣржимое стремление, сердцу копие, иноком жжение, очесем поползение, покоище змиино, смертоносная бесѣда, неоставляющая трясовица, неутолимая огневица, мужу спящая лѣсть, востающая печаль, самохотная злая ратница, грехом учителница, тѣмный вождь, хоругвии адова, ниспадаемое желание, вѣтвь дияволя, спасаемым соблазн, болѣзнь неисцѣлная, злоба безувѣтная, удобь уловляюща дерзость; жена злая — вѣтр сѣвѣр, день неведрян, гостиница жидовская, совокупленница бѣсовская, несытная похоть. Яко же ров глубок не наполнится водою и огнь дровами, тако и злая жена николи же наполнится хотѣния своего, и злоба ихъ не умаляется, имѣя сокровище злобы, источникъ зла кипя непрестанно».

    Рече сынъ ко отцу своему: «Отче, слухи моя наполнишася твоего наказания, уже душа моя ужасѣся, и разум мой умилися, и сердце мое восколебася, стоя пред очима твоима».

    Рече отецъ к сыну своему: «Сыне мой, не буди укоряти собою естество женское велми есть зло. Приточник же рече: «Бѣжи и не озирайся красот жен, яко Ной потопа и яко Лот Содомского запаления, и не буди с прилежанием зрѣти на чюжия жены, и не объят буди руками их, и не желаи ея, та бо погубляет человеки острѣйша меча». Никто рече: «Стрѣтил бѣ на пути лва, и на распутии разбойника и обоих сих убежах, а злыя жены не могох убѣжати. Аще кому случится злая жена пояти, то над чюжим мертвецом не ходи плакати, всегда бо ти есть у себѣ в дому плачь».

    Сыне мое и любимое мое чадо, вся сия видехъ и в писании обрѣтох и согласию твоему рекохъ».


    Статья: Бесѣда отца съ сыномъ о женской злобѣ
    Автор: Администратор




    Подѣлись: Бесѣда отца съ сыномъ о женской злобѣ : 29. Как учить мужу свою жену : Домострой : ДОМОДЕРЖЕЦЪ.ru